Pulso Ensemble nace no ano 2019 como continuación do proxecto Container Galicia. Centrado na música experimental de nova creación, Pulso aposta por un discurso articulado en torno á contemporaneidade e á relación entre o individuo e a revolución dixital. Os integrantes de Pulso teñen participado nos principais festivais europeos dedicados á música de nova creación, traballando con algúns dos compositores máis importantes da escea internacional como Michael Beil, Simon Steen-Andersen, Alexander Schubert, Stefan Prins, José Manuel López López, César Camarero, Fritz Hauser, François Sarhan ou Marko Ciciliani.

Nesta ocasión, Pulso presenta “Realidade”, un espectáculo multimedia formado por 5 pezas de carácter performativo, as cales nos invitan a reflexionar sobre o papel e influencia da imaxe na sociedade actual, a relación entre o humano e a máquina así como da representación do corpo a través dos medios dixitais.